أنا مش عارف أبدأ منين ولا حتى أقول إيه
الحكومة بتاعتنا اللي زي الفل باين عليهم
والله أعلم زهقوا من شعب مصر على الآخر
لدرجة إنهم عايزين يبيدوا الشعب المصري نهائياً
علشان ميكنش لينا وجود من الأصل
الحكومة أصدرت قرارتها برفع الدعم عن السلع الأساسية
بحجة إنها هتدي الناس الموظفين مقابل رفع الدعم
فلوس نقدية ومش كده وبس
هتعوضهم بزيادة كمان
يا سلام على حكومتك يا مصر
بس تقريباً والله أعلم نسيوا الناس الغلابة
الفلاحين
والصنايعية
واللي على باب الله
واللي ماشي اليوم بيومه
وعلى فيض الكريم
لما تلاقي كلام كنا بنقول عليه إشاعات
وتلاقيه إنه حقيقة واقعة وملموسة كمان
إزازة الزيت من 1/1/2008 هتبقى ب 10 أو 12 جنيه
وكيلو السكر من نفس التاريخ هيبقى ب 5 جنيه
ورغيف العيش كمان هيبقى بببريزة أو 15 قرش
وخلاص بقى إنسوا يا شعب مصر العيش أبو شلن
والموضوع طال الأنابيب كمان
لدرجة إن الأنبوبة هتبقى ب 12 جنيه
وإنسوا الطبيخ كل يوم يا أمهاتنا
زمنه انتهى وراح
ومش كده وبس لا الكلام ده على كل السلع الأساسية
بس الحاجات دي اللي قدر الشعب يعرف سعرها بدري
أولعوا بجاز بقى يا غلابة
وياللي عايشين على رغيف العيش
الحكومة مخلتش ليكم حاجة لا تاكلوها ولا تشربوها كمان
ووصل الحد كمان علشان يطول الجاز والبنزين من تاني
يعني المواصلات هتغلى تاني
وحتى اللي ربنا كرمه ومعاه عربية هيصرخ من سعر البنزين الغالي
وخدوها كعابي بقى يا شعب مصر الغلابة
واشحتوا بقى علشان حق البنزين يا أصحاب العربيات
وقال إيه بقى إحنا الشباب بنفكر في أمل وحلم لمستقبلنا وحياتنا
وكل واحد فينا لسه بيقول يا هادي
خلاص بقى نخ وأقعد مكانك
واستنى لما ربنا يفرجها عنك من عنده
لكن من حكومتك وبلدك إنسى للأبد
لما بعد كده بقى نلاقي ناكل ونشرب
نبقى ساعتها نفكر في مستقبلنا وحياتنا
وربنا يعين أهالينا على حياتهم وحياتنا
وربنا يعين الناس الغلابة على لقمة عيشهم وحياتهم
وفي آخر كلامي ولو إن كلامي ملهوش آخر ... هقول
حسبي الله ونعم الوكيل في الظالم والمفتري
وفي كل فاسد واكل قوتنا علشان يلم المليارات
وأحب أقول لحكومتنا كلها من أكبر رأس فيها لأصغر رأس
أرحموا شعب مصر في الأرض
يرحمكم الله في آخرتكم
ربنا يرحمنا ويقدر أهالينا يارب
على اللي إحنا فيه
وربنا يلهمنا كلنا الصبر
ويدينا الحياة الكريمة اللي
بنتمناها
NOSHA
ــــــــــ
16 comments:
حبيب قلبي نوشة
و الله يا بني انا ما عارف اقلك اية بس انت عارف الحكومة بتاعتنا غلابة و فقيرة و الريس بيشحت قالوا يخدوا من الشعب الغني اللي معاه فلوس و بخيل اللي بياكل جاتوه الصبح
اقلك اية بس
"يمهل و لا يهمل"
السلام عليكم
نوشه
تعرف اناا بقالنا سبعه الاف سنه ةمصر بتنسرق ولسه خيرها ما خلصش
بس احنا اللي كسالي
وبنتواكل علي الحكام
دونقول هما اللي فاسدين
علي راي ساره مدونه انا محظوره
من اعمالكم سلط عليكم
يعني مبارك قدرنا
ههههههههههه
لازم نتغير احنا الاول وكله بقي بايد ربنا
سلامي
ياعم نوشا انت عاوز ايه من الحكومه هو كل واحد عاوز كل حاجه من الحكومه يعني مش كفايه اننا عايشين وبنشتغل كمان انا عن نفسي الحمد لله شغال وميت فل و14 وباخد 105 جنيه كل اول شهر بعد ما المدرسه تطمع في الخمسه باخد 100 بركب مواصلات للمدرسه ب36 جنيه يعني بيتبقى 64 جنيه حلوين اوي الحمد لله يعني اليوم واقف باتنين جنيه انا مش طمعان في اكتر من كده حاكل واشرب والبس واتجوز واخلف واربي العيال منهم وكمان هحوش واشتري عربيه انا مش عارف الناس حاقده ليه علي الحكومه سيبوكم بقا من الحقد الطبقي ده واحمدوا ربنا انكم لسه فيه شوية هوا بتتنفسوهم
نوشه اولا فى تصحيح بسيط
الدعم هيتلغى من اول 7
ع فكره انا كنت كاتب بوست فى الموضوع ده
حسبنا الله ونعم الوكيل
والله وجعت قلوبنا يانوشة
الناس هتلاقيها من اييه ولا ايه
الشباب هيعمل ايه
ظلم ورا ظلم
وفساد ورا فساد
هنسيبلهم الدنيا بس ونروح فين
ربنا ينتقم من كل ظالم
وربنا يصلح الحال
حاسة بيك بتصرخ
زي ماكل الناس بتصرخ
ياريت حد يسمع
ويقدر حجم الصرخة
ياااااااريت
حبيب قلبي شمس
إحنا من كتر فلوسنا يا راجل بناكل بقلاوة مش جاتوه وبس
الله يكون في عوننا ويصبرنا
عصفور باشا
تعليقك منور المدونة
إحنا مش كسالى والله ولا إحنا فينا حاجة غلط بس مشكلتنا الأكبر في حياتنا كلنا إن الشعب المصري شعب كله غلابة ومغلوب على أمرهم ويلا مبارك قدرنا قدرنا وربنا يقدرنا على الصبر والدعاء برفع الظلم والفساد عنا
علاء حبيب قلبي
إنت أحسن حاجة تعملها إنك تطبق ال 64 جنيه بتوعك وتحافظ عليهم كويس جداً ومبتبقاش مبذر علشان الفلوس تقعد معاك شهرين تلاثة هو المبلغ ده شوية في مصر يا راجل ده حتى إنت تاكل وتشرب وتلبس وتتجوز كمان وبيفضل معاك شوية فكة ولو حوشت عليهم شوية هتجيب عربيتين مش عربية واحدة
الله يكرمك ويباركلك يا حج
مارو
إيه يا عم الحج زعلان ليه أنا وأنت واحد وسواء إنت تكتب أو أنا أكتب المهم القضية نفسها تتناقش مش مهم مين اللي يكتب الأول
تحياتي ليك يا حبيبي
فارس وحيد
ربنا على الظالم والمفتري
بطة ـ بنت الإسلام
قلوبنا موجوعة من زمان بس لازم الواحد يجي على الجرح شوية يمكن الناس تحس بالواقع المخيف اللي إحنا داخلين عليه وياريت بقى إننا نصرخ بجد من قلوبنا ونقول لا للظلم والفساد والقهر ولو لمرة واحدة في حياتنا
هاي نوشة
والله انا مقدرش اقولك غير
" حسبي الله ونعم الوكيل"
في المفتري ابن الحرام
ونتشرف بزيارة مدونة العندليب
http://el3andaleb.blogspot.com/
تحياتي
العندليب
تخيل انا كل يوم يا نوشه اقرا الاخبار الصبح الاقي حاجه بتغلي لما هيجلي الضغط والسكر واحتمال كبير جلطه كمان
بس يعني ربنا يهدي الحكومه بتاعتنا
خليكـــــــــــــــــــــــــوا شاهــــــــدين
يمكـــــــن أحتاج شهادتكـــم فى يــــوم من ألأيــــــام
الـــــــى السيد اللواء / حبيب العادلـى
وزيــــــر الداخليـــــــــــــــة
الـــــى السيد اللواء دكتور / مساعـد وزير الداخليــــة
مديــــــــــــــــــــر ادارة الشئون القانونية
الـــى السيد اللـواء / مسـاعد وزير الداخلية
مديــــــــــــــــــر ادارة تنفيـــــــذ ألأحكـــــــام
الــى السيد اللواء / مساعــد وزيــر الداخليـــــــــــة
مديـــــر مباحــــــــث ألأمـوال العامــــــــة
الـــــــى السيد اللواء/ مساعد وزيـــر الداخليـــــــــــه
مديــــــــــر أمـــــــــــــــــــــن القاهـــــــــره
الــــــــى برنامـــــــــــــــــــج 90 دقيقة السيد / معــــــــــــتز الدمرداش
ومعد البرنامج السيد / بشير الذى اتصلت به أكثر من مرة
مطلـــــــــوب القبــــــض
على نصاب شقق زهراء المعادى / بالمعادى / بمحافظة القاهرة
المهندس / ايهاب فراج محمد ابراهيم الزينى
وعلـى كـل من يقابله التفضل بتسليمه مشكورا لأقرب قسم شرطه أو أقرب رجل أمن
وهذا النصاب تم تأييد الحكم علية بالسجن فــى القضية رقم 9443 لسنة 2007 م جلسة 4/11 /2007 م محكمة المعادى حصر رقـــم 13182 لسنة 2007 م و صادر ضدة اكثر من ثلاثون حكما قضائيا
وعنوان سكنه وعنوان الشركة / شركة الزينى للتعمير 56 طريق مصر حلوان الزراعى برج بــــــدر / أمــام فندق المعادى
بطاقة رقم 27003211203839
و النصاب يتنقل بين مدينة 6 أكتوبر بمحافظة الجيزه و مدينة المنصورة بمحافظة الدقهلية /// ومركز بشبيش بطنطا بمحاظة الغربية
وعليه أكثر من حكم نصب واحتيال وجارى نشر اسماء وعناوين أقاربه وكل من تربط بينه وبينهم صلة نسب أو متسترا عليه
الشريف / جمال طـه
تليفون رقم 0104710778
( المواطن هو رجل ألأمن ألأول فى محاربة الجريمه والتصدى للمجرمين )
و للعواطف فى قلب المرء حال
كل عام و انتم الى الله اقرب و على طاعه ادوم
تحياتى ابو مفراح
Post a Comment