Wednesday, August 13, 2008

الناس اتجننت ولا إيه ؟

ظاهرة غريبة يا جماعة ظهرت من ففترة قريبة مش بعيدة إن الناس اتجننت بالمسلسل التركي اللي اسمه نور وبطله الشاب مهند مرة واحدة كده من غير سابق إنذار لقيت الدنيا كلها بتتكلم عن الشاب مهند واللي بيعمله في المسلسل وبيتكلموا كمان عن سلوكه وعن تصرفاته وعن حياته ونسيوا تماً إن كل ده تمثيل في تمثيل ولمجرد الحبكة الدرامية مش أكتر من كده
ولا بقى البنات بتوعنا اللي ماشاء الله عليهم ميتين في مهند مووووووت وكل واحدة فيهم نايمة صاحية قايمة بترغي مع صاحبتها مفيش وراهم غير مهند وطبعاً ده مش لكل البنات ولكن فئة منهم بس ومش البنات وبس ده حتى الشباب كمان وحتى كبار السن والعواجيز ويمكن كل طوائف المجتمع مفيش وراهم غير الشاب مهند
حتى الفضائيات يا جدعان كل لما أقلب قناة ألاقيها بتعلن عن إنها هتعرض مسلسل الشاب مهند عن قنواتها ده بقى غير الإعلانات للمسلسل بعد كل فاصل إعلاني أو أي فاصل والسلام ومش كده وبس ده أنا كمان لقيت منتديات ومواقع بترزق من ورا الشاب مهند فلقيت مثلاً موقع خاص للموبايل حاطط قسم خاص لثيمزات الشاب مهند ولقيت مواقع تانية تقولك إلحق قبل الحذف كل ما تريد معرفته عن مهند تجده عندنا وفيه كمان ناس تانية تاعبة نفسها على الآخر ورافعة حلقات المسلسل كله من أول حلقة لحد الحلقة ال 140 تقريباً أو أقل والله أعلم ده غير المقالات والشعر والغزل اللي بتتقال في الشاب مهند
هو الناس حصلها إيه يا جدعان ........ هما اتجننوا خلاص ولا إيه ؟
نسيوا الحالة اللي إحنا فيها والظروف اللي بيمر بيها الشعب كله نسيوا كمان الحالة النفسية للشباب اللي خلاص قرب يفقد الأمل في أي مستقبل أو حياة جميلة نسيوا كمان براءة السفاح ممدوح عباس من قتل الأبرياء نسيوا كمان المليادير المصري أحمد عز محتكر الحديد في مصر واللي بيعمله في أسعار الحديد كل يوم والتاني
نسيوا كل الفساد والظلم اللي قرب يوصلنا للهلاك خلاص نسيوا السرقة فينا وفي قوتنا وفي حياتنا وفي كيانا وفي كل حاجة حوالينا وبلاش الظروف والحالة اللي الشعب فيها وبلاش كل اللي أنا بتكلم فيه ده اعتبروني شاب اتجنن هو كمان وبخرف وهلوست خلاص بس مش لدرجة إنهم نسيوا إننا داخلين على أيام مفترجة ومباركة ومحتاجين إننا نعمل كل خير ونفكر التوبة والتقوي وطاعة ربنا
وعمل الخ
ير ونمحي شوية من الذنوب اللي مغرقة كل واحد مننا
أنا بجد مش حاسس إن فيه أي جو لقرب رمضان مش حاسس باللذة والفرحة واللمة بتاعة زمان

وعموماً بغض النظر عن أي شيء فأنا أحب إني أرسل تحية خاصة لكل حبايبي وأصدقائي وإخواتي بقرب حلول شهر رمضان المبارك
أعاده الله علينا جميعاً بكل الخير والبركة


بس هنقول إيه بقى مينفعش إننا نفكر في كل ده لازم إننا نفكر بس في الشاب مهند عن جماله وعن حلاوته واللي عمله واللي بيعمله الظاهر كده والله أعلم إن الناس نسي
و كل حاجة نهائياً نسيوا كمان ...... ونسيوا كمان ..... ولسه هينسوا كمان تقريباً مبقتش فارقة خلاص وتقريباً أكتر الناس اتجننت خلاص
وأنا كمان اتجننت معاهم بس يلا بقى حسن الختام

20 comments:

ola_barakat said...

شوف يابني
انا مشفتش ولا حلقه م المسلسل ده الحمدلله يمكن عشان كده لسه بعقلي شويه
لكن اقولك علي كام حاجه كده
اولا : الناس زهقت من اللي بيحصل عندنا كل يوم واللي انت رصيته تمام ف البوست
ثانيا : الناس عايزه تغير بقي وتشوف حاجه تخرجها م الكآبه اللي هما فيها وبما ان مافيش كوره اليومين دول يبقي مافيش مانع من مهند
ثالثا : اكيد تصرفات مهند ده ف المسلسل حاجه كده سوبر رومانسيه يعني اللي كل واحده بصرف النظر عن السن نفسها تشوفه ولو مره واحده من حبيبها قبل ماتموت
واخيرا : بص كويس لصوره مهند ياعم بذمتك ده واحد مايجننش البنات ؟
هههههههههههههههههههههههههه
علا بركات

بنت الاسلام said...

والله العظيم كنت هكتب بوست عن الموضوع ده امبارح بس معرفش حصل ايه وماكتبتش دانا محروق دمي حرقة اد كده عندنا قابلية واستعداد عالي للتفاهة ياربي لاء وانت مادخلتش علي المواقع بقي وشفت العناوين الجذابة منافسة بين دقن وتسريحة مهند وسلسلة تامر حسني وشامة نور ومعرفش عيون مين وربنا حاجة تقرف انت معاك حق في العنوان الناس فعلا اتجننت المصيبة ان انا شفت كام حلقة من المسلسل ده مافيهوش جديد قصة رومانسية يحبوا ويبعدوا زي افلامنا العربي القديمة بس اهي حاجة يلهوا فيها الناس اكتر ماهي

كل سنة وانت طيب يانوشة ورمضان كريم

تحياتي

ومعلش احنا بنتجنن

The Führer said...

يووووووه ، هي نور دي ورايا ورايا ، أنا كرهت التليفزيون والدش والإم بي سي وتركيا وكرهت نفسي بسببها.
نفسي ف يوم ألاقي نور ماتت أو مهند اختفي أو أفقد الذاكرة وارتاح.
مش عارف أتفرج ع التليفزيون يا ناس.
مش عارف اتفرج علي ماتشات كورة!!

ارحمووووووووونا

ميرا ( وومن ) said...

ياااااااااااااة يا نوشة
كل دة في قلبك وساكت ياراجل دة حقد بقي

ههههههههههههههههه

بهزر تصدق بالله من كام يوم بتكلم في التليفون ومشاغلين المسلسل قدامي الاقيلك اية بقي نور هاتتحرق في العربية دورت وشى ورجعت تاني لقت العربية ولعت قولت الحمد لله المسلسل كدة قفل اهي نور ماتت وخلاص مهند هايقعد ارمل يربي بنتة الا قيهم مفيش ثانتيم بيجروا بعيد عن العربية الكلام دة في الحلقة 128

يالهههههههههههوي المسلسل دة جربوا فية كل حاجة دة عدي مرحلة الأفلام الهندي والغريبة اني بفكرني بنفس حالة ذا بولد اند بيتوفل قبل ما التلفزيون المصري يمنع عرضة

تصدق انه لسة بيتعرض بعد لاعمر دة كلة علي الشو تايم

دي نااااس يا نوشة معندهاش مشاكل غير انها تحب وتتجوز وتطلق وادينا بنتسلي
ملحوظة
-------
انا بتفرج علي حلقة كل 10 : 15 بالصدفة

كل سنة وانت طيب الحمد لله الذي بلغنا رمضان

nosha said...

الأستاذة / علا بركات
نورتي وشرفتي المدونة بزيارتك الجميلة

مهما كان كمية الزهق عند الناس ومهما كان احتياجهم للتغيير ميكنش بالتفاهة والاسلوب ده لإن ده بيدل على إننا شعب دماغه فاضية وبيدور على أي حاجة تلاهيه عن المصايب اللي هو فيها يعني بالعربي الفصيح كده اسمه هروب من الواقع وعدم القدرة على مواجهته

بس على العموم بقى ....... يلا خلي الشعب وخاصة البنات يفرحوا وينبسطوا شوية

تحياتي ليكي

nosha said...

أختي العزيزة الغالية جداً بنت الإسلام
كل سنة وإنتي طيبة وكل الأمة الإسلامية بألف خير وسلامة وربنا يجعل أيام رمضان كلها خير ومحبة وكسب ثواب وتقوى
وبالنسبة للموضوع بقى فأكيد طبعاً إن أنا لو كنت أعرف إنك هتكتبي عن الموضوع ده كنت هتنحى تماماً عن كتابة أي سطر فيه علشان إن أنا عارف كويس قدرتك على توصيل المعلومة أكتر مني وعلشان أكتر إنك بنت وأكيد هيتفهم الوضع أكتر

وأهو بقى على رأي الأستاذة علا لما بتقول إن البنات والسيدات كمان بيدوروا على شوية رومانسية مش لاقيينها في حد خالص سيبيهم يحبوا بقى ويقضوها رومانسية يومين

نورتي المدونة يا بطوط

nosha said...

The Führer أو هقول المتمرد بقى يكون أحسن
نورت المدونة بزيارتك الجميلة
ووالله أنا كرهت التليفزيون والدش من قبلك بكام شهر مش دلوقتي بس بسبب برده الحاجات الغريبة اللي بنشوفها كل يوم سواء مسلسلات سواء برامج سواء إعلانات سواء حتى فتاوى من بعض الشيوخ والدعاة الحلوين بتوعنا

بس أنا بقى أخدتها من قصيرها ومبقتش أتفرج على تليفزيون نهائي
وحتى ماتشات الكورة اللي بتفرج عليها وبحبها بروح الاستاد أشوفها

ربنا يرحمنا جميعاً من كل البلاوي دي

تحياتي ليك

nosha said...

العزيزة الغالية وومن
كل سنة وإنتي طيبة ويجعل رمضان أيام كله خير وبركة ومغفرة وثواب علينا كلنا يارب
وبالنسبة للموضوع ده فأنا والله مشفتش ولا حتى دقيقة واحدة من المسلسل ده بس واضح من كلامك كده صحيح إنهم عملوا كل حاجة ممكنة علشان يضحكوا على الناس ويخلوهم يتهبلوا ويتجننوا كده لدرجة إنهم غلبوا الأفلام الهندي كمان

والمشكلة بقى الناس اللي إنتي بتقولي عليهم دول فالطلاق موجود وكتييييير أوي لكن بقى اللي بيتجوزا دول فين ؟ هو فيه حد بيتجوز في أيامنا الغبرة دي ؟
سلالالالالالالام

حسن مدني said...

عزيزي نوشة

تعرضت بالأمس - في ظروف خاصة - لمشاهدة أجزاء من إحدى حلقات هذا المسلسل. ولم تكن تجربة سعيدة بأي حال.

هذه المسلسلات مصممة خصيصا لقتل الوقت، وخلق حالة من الوهم يهرب إليها من لا يجد ما يشغل فكره، أو اليائس من تغيير أوضاعه.
لذلك يهرب إليها البعض من شبابنا. أو فارغي العقول لدينا.

كل عام وأنت بخير.

تحياتي

ابو النجوم said...

نوشه
يابنى الناس عندنا دماغها فاضى والحياه مفيهاش مشاكل وعلى رأى صلاح جاهين الحياه بقى لونها بمبى .يانوشه فيه اله جهنميه اسمها الاعلام ودى دايما لما تيجى تغطى على مصيبه توجه الناس بعيد عنها ولو تلاحظ ان حكايه المسلسل دى حدثت مع حكم العباره وقيام بعض الدول التابعه لامريكا باأفتتاح سفاره لها فى بغداد لتكريس الاحتلال الامريكى والاعتراف به .احنا شعب غبى وبينضحك علينا بسهوله زى اميتاب باتشان لما حضر للقاهره واللى حصل فى المطار . احنا شعب مات من زمن ولا تجوز عليه الرحمه لانه شعب خاضع وغبى

المنسى said...

ياعندليب قول شكوتك
وأحكى عن بلوتك
الغنى مش حيموتك
غنما كتم الغنى هو إللى حيموتك
وعجبى


صوتك وصل وصراخك كمان
ولكن

shosha said...

سلامو عليكوو
بص يا أستاذ نوشا ..
الناس عايزة الرقي و بتتمنى تشوف ميديا جديدة و رؤية وردية للدنيا اللي دفنتنا بالحيا و الحمد لله الناس لقيت دا في مسلسل نور الرائع عيب عليك تهاجم مسلسل مهذب ناجح زي دا .. أنا شاهدت كل حلقات المسلسل و مستني الأعادة ..

لا تسمع لما كتبته في الأعلى .. !
أنا أمزح فقط من كتر القرف اللي جوايا أنا عمري ما شفت ولا حلقة و مش عايز ..
كفانا تفاهات غربية و دعوة للمعصية .. أنا معك في كل كلمة تفضلت بها سيدي ..
ملحوظة : أنا محمد مش أحمد زي ما حضرتك كاتبني على اليمين ..
دمت سالما

nosha said...

صديقي العزيز حسن مدني
إلى هذا الحد أصبح الاستهزاء بعقول الناس وأفكارهم ؟
وحتى لو حدث هذا فلماذا ينساق الناس وراء تلك الأشياء التي تقتل الوقت وتبعث الوهم ألهذه الدرجة أيضاً وصلت عقول الناس ؟
ولكن إذا كان هذا وصل إلى هذا الحد فيرحمنا الله ويكن في عوننا ليجعلنا نفيق من تلك الغيبوبة الدائمة التي نحن فيها

أشكرك على زيارتك الكريمة

nosha said...

أبو النجوم عمنا منور المدونة كلها يا باشا أنا طبعاً عارف وجهة نظرك تماماً من قبل ما تقولها لإننا اتكلمنا في كده كتير مع بعض بس طالما إحنا شعب مات بالحيا من زمان فأكيد لينا صحوة وبعث من جديد من الموت اللي معيشينا فيه بكل معانيه وفي كل شيء وهيجي يوم أكيد والصحوة هتبقى للجميع ومحدش في الدنيا دي كلها هيقدر ينيمه أو يموته تاني

تحياتي ليك يا أبو النجوم

nosha said...

صديقي وأخويا العزيز المنسي
طيب لحد إمتى هنفضل نشتكي ونحكي ومحدش يسمع لينا ؟ ولحد إمتى هنفضل سلبيين ومناسقين كده لأتفه الأسباب ؟

ياريت لو ألاقي عند أي حد إجابة لسؤالي

nosha said...

صديقي العزيز الدكتور محمد أبو شوشة
نورت وشرفت المدونة بزيارتك الجميلة
فعلاً كفانا تفاهات وكلام يلهي العقول ده إحنا اللي فينا يكفي شعوب بحالها مش إحنا وبس والقرف والزهق اللي جوانا كلنا ده هيفضل مستمر طول ما إحنا دماغنا فاضية ومش بنفكر في غير الحاجات اللي ملهاش قيمة

أشكرك على زيارتك وآسف إني غلطت في الاسم بتاعك ... بس أعذرني بقى ... جل من لا يسهو وعلى فكرة أنا عدلت الاسم فعلاً

تحياتي ليك

micheal said...

صباحو هيافة وكل سنة وانت طيب
تحياتي

بنت القسام said...

نوشه
اولا ازيك عامل ايه طيارب تكون بخير دايما
ثانيا
هو بصراحه انا بحب المسلسل دة جدا
يعني انا شايفه ان الناس زهقت من الحياه الى حواليها بصراحه يعني والملل بتاع التلفزيون المصري
فلقو حاجه جديدة مفيش مانع انهم يتفرجو عليها كنوع من التنفيس عما بداخلهم
يعني خلاص يانوشه الشعي مكبوت
بس عندك حق حاله الجنون الفظيعه دي
بجد غريبه وتحرق الدم
اختك جيلي انا حلمت بالواد مهند دة 5 مرات
بعد ماكنت مش بشوف تلفزيون خالص
تخيل
هههههه
ربنا يهدينا كلنا
بجد بحاول انى مش اتفرج عليه واستعد للايام الى جايه
ربنا يصلح لينا الحال
تحياتى
وكل سنه وانتا طيب يااااارب
جيلان

مدونة حكومتى ملاك said...

السلام عليكم ,
احنا أصبح عندنا ههوس بأبطال المسلسلات والافلام كأنهم صحابة ونسينا انهم شخصيات خيالية
المشكلة ان صناع المسلسلات والافلام بيصوروا الشخصيات دى كأنها ملائكية والناس خلاص نست اللى بيحصل فى العراق وفلسطين وأفغانستان ونسوا غلاء الاسعار والبطالة والمشاكل كلها وقعدوا أمام التلفزيون .
ولا حول ولا قوة الا بالله


تحياتى


عمار صبرى

Unknown said...

أسأل الله الذي لن تطيب الدنيا إلا بذكره
ولن تطيب الآخرة إلا بعفوه
ولن تطيب الجنة إلا برؤيته
أن يديم ثباتك ويقوي إيمانك وصحتك
ويرفع قدرك ويشرح صدرك
ويسهل خطاك لدروب الجنة
وأن يجعلك من عتقائه من النار
ومبروك عليك شهر رمضان

GOOGLE