الموضوع ده كان نفسي أتكلم فيه من زمان
بس بصراحة كنت مستني الوقت المناسب اللي أتكلم فيه
وأهو جه الوقت وهتكلم وأقول كلامي وإنطباعي عن المدونين
أولاً أحب إني أسجل إعتزازي وأحترامي لكل المدونين بلا استثناء
ومش بقصد بكلامي أي إساءة لأي حد
وأخش في الموضوع بقى
المدونين أصناف حسب وجهة نظري المتواضعة البسيطة
ناس عايشين في الحقيقة اللي عايشينها بحلوها ومرها
وناس عايشين في خيالهم الواسع الجميل
وناس تانية عايشين في التخاريف والوهم
وتعالو بقى نتكلم عن صنف لوحده
الناس اللي عايشين في الحقيقة عايشينها بجد زي ما هي
بكل بساطة وبكل حب وبكل تفاؤل
حتى وهي زي الزفت
عندهم أمل في ربنا وأمل تاني في إن بكرة أحلى
تلاقي كتاباتهم كلها عن حياتنا البسيطة اللي عايشينها
ومواقفها اللي منها يحزنك على الدنيا وما فيها
واللي تفرحك وتديك الأمل الجديد في بكرة
يعني التلقائية التامة هي سمة أقلامهم
والحقيقة الواقعية وحياتنا هي كتاباتهم
ونيجي بقى للناس التانية أو الصنف التاني
تلاقيهم ناس عايشين في خيالهم الجميل بفنهم وشعرهم وقصصهم
تلاقي منهم الشاعر الجميل اللي يبهرك بشعره وكلامه
وتلاقي منهم الفنان اللي فنه أفضل من فنانين كتير جداً
وتلاقي منهم الأديب والكاتب اللي بيكتب قصص وروايات
من أجمل وأروع ما تكون
وخيالهم هو تدوينهم وهو اللي بيتميزوا بيه
والناس دي أنا بعتبرهم من أفضل المدونيين
ونيجي بقى للصنف التالت اللي عايشين في التخريف والحلم وبس
تلاقي منهم اللي معتقد إن كلامه هو أفضل الكلام
في التدوين على الإطلاق
وتلاقي منهم اللي معتقد إن كلامه هيقلب نظام الحكم
وهيعمل بيه ثورة و قلق
وتلاقي منهم اللي بيدور على مصلحة شخصية
أومجد شخصي عن طريق التدوين
ومنهم اللي عايش على إنه سعد زغلول باشا .... أو أحمد عرابي
وتلاقيه يعمل ثورجي ومناضل وهو في حقيقته
غير كده نهائي ومشكلة الناس دي كلها بقى إنهم بيعتقدوا
إن هما بس المدونيين وإن هو ده التدوين فلا تدوين غير كده
وأحب أقول لبعض من الناس دي
فوقوا من وهمكم وعيشوا في الواقع
وكل واحد يدور على اللي يناسب
مستقبله وحياته وتفكيره
وفي الآخربقى وده للناس كلها
التدوين تفكير و فن وإحساس مش أي حاجة وخلاص
تحياتي لكل المدونين
ـــــــــــــــــــــــــ
NOSHA
ــــــــــ
26 comments:
حبيب قلبي
شفت اول تعليق اي خدمة
المهم بقى يا حج اني بحمد ربنا اني مش فكل دول
ههههههه
المهم بص يا سيدي كل واحد بيحكم على التاني من وجهه نظرة يعني ممكن اللي انت تشوفه ثورجي او عامل بطل يكون شايف نفسه مناضل و اللي عامل شاعر ممكن يكون محب بجد
المهم ان البوست عجبني صحيح انت كدة عامل ثورة جوة المدونين بس تمام عشان نتحبس على حق
لأ بجدبوست جامد يا نوشه، وبجد وضحلي حاجات كتير لأن لسه اخوك جديد في الكار ده، بس مش شايف فعلا ان ده ممكن يكون رأيك انت بس يعني مش قاعده، يعني ممكن واحد يكون ثورجي وايه العيب في كده ممكن بجد يكون هو مؤمن بفكره ما نفسه تتحقق وممكن واحد يكون بيكتب بكل بساطه بس هو برضه جواه زفت وعاوز شهره ومجد يعني مش قاعده بس بجد بوست جامد....... تحياتي ليك ويارب دايما للأحسن سلام يا مان
كلام جميل يا نوشة، بس الأنواع ممكن تتفصل أكثر من كده،
يعني فيه اللي بيحاول يعمل حاجة مش بالضرورة عايش في الوهم، وفي اللي عمل حاجات. وفيه اللي عايش حياته بمرها بس، أو بحلوها بس..
على كل حال، هو بوست جيد
تحياتي
معاك حق يانوشة
اصناف واصناف
فياتري اي صنف اكون انا
سؤال اساله لنفسي
اولا
السلام عليكم
عزيزى نوشا
اختلاف الاراء و التعليقات من شخص الى اخر سنه كونيه
يعنى ممكن تكون وجهه نظرك هذه غير وجهه نظر الاخرين
انتا ممكن تكون بتحب المدونين اصحاب الحس المرهف فى الشعر و الادب و قصص الحب و العواطف و اذا نظرنا الى اغلب تدويناتك رايناها من هذا النمط و هذا ليس عيبا لكن ان نضيق من الدائره و نضع من وجهه نظرك ان المدونين هم من يكتبون الشعر و القصص العاطفيه او مثيلاتها فهذا تضييق من متسع وما ينفع لشخصك لا يقبله الاخرون
تحياتى اليك عزيزى وكل عام و انتم الى الله اقرب و على طاعه ادوم
ابو مفراح
نوشة يعطيك العافية .. البوست هيقلب النظام التدويني عندنا وهتبقى انت الثورجي ;)
البوست حلو وفيه افكار عميقة يمكن بساطة الطرح عشان الكل يوصل للمضمون بس كلامك له ابعاد كتيرة
بالآخر طلعنا زي مطربين العصر كل واحد غنى بالحمام وشاف صوتو حلو عمل كليب وكاسيت ودقي يا مزيكا
وكل واحد كتب كلمتين عمل مدونة ونزل بوستات وافرح يا نوشة
دمت بخير وموضوع بجد حلو :)
أم المييس
نوشه
مع احترامى للبوست
بس انت جبت ايه جديد ؟
ما دى اللى الناس عرفاها
انا افتكرتك هتكون اشجع من كده و تصنف اللى تعرفهم و من غير زعل و ده حئك
بس انت نسبت تقول ان فى ناس عايشه فى الدور و فاكره ان الامن بيضهطها
من اخر سطر ليك فى البوست اللى بتقول فيه
وأحب أقول لبعض من الناس دي
فوقوا من وهمكم وعيشوا في الواقع
افهم من كده انك من النوع الاول ؟
اؤيدك في كل كلمه نطقه بها
بس التدوين ده بقي رئة الحريه
لكل واحد حريه في الافكار الواقعيه و الاحلام و حتي الاي شايف نفسه احسن واحد و هايهد الدنيا بكلامه
التدوين جعل كل واحد فين هو نفسه الاي بيحلم بيها حتي لو خطا او وهم او حلم يا نوشا سيب الناس تحلم وتتخيل نفسها زي ما تحب حتي لو غلط
هو ده جمال التدوين
تحياتي
أولا...أحب أبدي إعجابي بالمدونه التي تنم عن شخصيه جميله
لسه لم أقرأ الا بعض البوستات و شدتني
تصنيفك للمدونيين جميل و واقعي...بالنسبه لي فأنا ألجأ للتدوين كمفذ للتعبير عما بداخلي و في الوقت نفسه بتعرف علي شخصيات جميله من خلاله أستطيع تبادل الاراء و وجهات النظر معهم
تحياتي
صديقي وأخويا شمس
أكيد أنت مش في كل دول .... وعلى فكرة أنا مش بحكم على الناس ولا بأنتقدهم ولكن أنا بقول الكلام ده من وجهة نظري وبحكم معرفتي بالمدونين وشخصياتهم وفي الآخر أكيد كل واحد عارف نفسه كويس جداً وواثق من نفسه ومن تصرفاته وكتاباته
تحياتي ليك يا صديقي
mado80
ربنا يخليك يا مادو على إشادتك الجميلة وهرجع تاني وأقول إن كل واحد ليه وجهة نظره وشخصيته اللي مقتنع بيهم ومفيش أي عيب في إن واحد يكون مؤمن بفكر معين ودي حياة كل واحد وهو حر فيها
تحياتي ليك يا مادو ونورت المدونة
حسن مدني
أكيد الأنواع ممكن تتفصل أكتر من كده بكتير وفيه ناس كتير بيحاولوا يعملوا حاجة وده حقهم طبعاً وفيه ناس كتير عايشة في ملكوت الله ومش حاسين بأي حاجة من اللي بيجرى حواليهم
أشكرك على زيارتك الجميلة وتحياتي ليك
بطة ـ بنت الإسلام
ربنا يخليكي يا بطة على كلامك وأكيد مش إنتي لوحدك اللي تسألي نفسك لازم الكل يسأل نفسه ... وبرده في النهاية كل واحد عارف هو أي صنف
أبو مفراح
طبعاً جداً الإختلاف موجود في كل زمان ومكان وأنا مش بتكلم عن نفسي أو الكتابات اللي بحبها ومش بضيق الدائرة ولا بحجر على كتابات أو فكر حد ولكني بناقش الكلام ده من وجهة نظري أنا ومش بحكم على الحكم لإن الكلام ده ملهوش أي علاقة بأي كتابات أو أشخاص معينين
أم المييس ـ مجموعة حياة
نورتي المدونة بزيارتك وربنا يخليكي وألاقيكي دائماً في أفضل صحة وعلى كل خير وسلام
وتسلملي إشادتك الجميلة وأتمنى إن ناس كتير تفهم ما وراء السطور واللي أنا أقصده وبتكلم عليه وإن كل واحد ميفهمش الكلام من منطلق تفكيره وشخصيته وبس
محمد مارو ـ حبيبي الندل
عندك حق يا مارو أنا مجبتش كلام جديد بس من وقت للتاني لازم الناس تفتكر الكلام ده وتحس بيه وتفهمه وأنا مش بتكلم من منطلق شخصي ومصنفتش نفسي ولا صنفت أي حد
تحياتي ليك يا ندل
دنيا محيراني
مفيش شك ان كل واحد ليه حرية رأيه وتعبيره وده شيء مفيش فيه نقاش وانا زي ما قلت قبل كده اني مش بحجر على كتابات او افكار او شخصيات حد لاني مستحيل ان يحصل ده مني ولكن انا بناقش وجهة نظري في شيء معين وزي ما انتي قلتي ان حلاوة التدوين في ان كل واحد بيقول رأيه حتى لو غلط وانا اهو بقول رأيي يا ترى انا صح ولا غلط ؟؟
مش مستني الاجابة
micheal
أشكرك على إشادتك وتشجيعك ليا التدوين منفذ للتعبير عن الرأي وعن اللي داخل كل واحد فينا ومش إنت لوحدك لإن التدوين هو العالم الحقيقي اللي كل واحد فيه بيقول رأيه وإحساسه وتفكيره وبيعبر عنهم بكل صراحة وأهم ما في التدوين زي ما إنت قلت هو تبادل الأراء والثقافات ووجهات النظر مع كل الناس ولو حتى بالإختلاف أو السلب
تحياتي ليك
حبيب قلبى
بصراحه البوست رائع وعندك حق فعلا فى عالم التدوين
اشكال كدة بس سوال انت من اى نوع
هههههههههههههههههه
تحاتى
احمد الجيزاوى
جيزاوي حبيب قلبي منور المدونة يا حج ده إحنا حصل لنا البركة
وشكراً على الإشادة الجميلة وكل ه طبعاً من وجهة نظري المتواضعة .... والنسة بقى ليا أنا فأنت أكتر واحد عارف أنا أي نوع
تحياتي ليك يا جيزاوي
السلام عليكم
ازيك يانوشه
وحشنى والله يعلم
اولا احييك على الجرئه فى العرض
بس أحب أقول لك
زى ما الحاج مارو قال لك
فى أنواع كتير
بس انت يكام جبت المعظم
بس أحب اقول اللهم اجعلنا كما يظنون
واللهم ارزقنا الاخلاص فى كل حرف وفى كل كلمه تقال مننا
يارب يانوشه
سلام ياحبيبى ولنا عودة
الشاعر الحقيقي بجد إنت واحشني أكتر والله
بس أحب أقولك أنا مجبتش المعظم ولا حاجة ولا أقصد بكلامي أي حد ورنا يرزقنا الإخلاص والحب والسلام طول ما إحنا عايشين يارب
تحياتي ليك يا صديقي العزيز
امممممممممم
ايه نوشه يا جامد افهم ايه من ورا البوست بس بجد تصنيف حلو قوى بس فيه ناس كويسه واطال برضه يا نوشه صدقنى يعنى بيبقى قلبهم على مصر والشباب بس ربنا يقدرهم بقى ويعملوا حاجه اما الوحشين التانين دول ربنا يهدى
هو يمكن الموضوع مطروح قبل الان لكن الفرق هنا انه مفصل ومبسط ايضا
يمكن عنوان الموضوع مضخمه شوية
تصنيف المدونين تجده دائماً مطروح في بال أي شخص مدون يكتب في مدونته أو يقرأ لغيره
وكثيراً أسأل نفسي عن الفرق مثلا بين المدونات والمنتديات ، وأرى فيما أرى من فروقات أنها واضحة
كل ما تكتبه في مدونتك ، مهما كان دافعك أو اتجاهك ، يعبر عن رأيك الشخصي الـ محسوب عليك .. ويقيمك الآخرين من خلاله
وحتى مع وضع أهداف صاحب المدونة في حسباننا ، فإن ذلك يظهر من اسلوبه وطريقة عرضه ، فمثلا هناك الموضوعات التي تكون قد مرت علينا كثيراً ونقرأها في مدونة ما بنفس الطريقة دون وضع خريطة جديدة للموضوع أو بناء طابع شخصي ، فهو هنا يريد إثقال ميزان مدونته بالمزيد من الموضوعات
رأيي أن المدونين جميعاً عليهم أن يستمروا في الكتابة والجميع يتعلم من بعضه في نهاية الأمر .. فالتدوين نافذة نحتاج جميعنا إلى النظر من خلالها وأن يدخل ضوء الشمس من خلالها على عقولنا وأفكارنا
تحياتي للموضوع وصاحبه والمشاركين فيه
appy
العزيزة الجميلة نورتي المدونة بزيارتك ... وكل واحد يفهم اللي عاوز يفهمه من البوست ,انا مش بقول إن الناس وحشة أو حتى فيه ناس وحشة ولكن أنا بقول وجهة نظر والسلام وأكيد فيه ناس كتير قلبهم على مصر
وبيحاولوا يعملوا حاجة
وفي الآخر أحب أشكرك على الإشادة الجميلة وتحياتي ليكي
deja vu
الموضوع فعلاً أتناقش قبل كده وناس كتير طرحته للمناقشة ولكن أنا حبيت إني أعبر عنها باللي جوايا وبنفسي وأنا قصدت إني أقدم عنوان الموضوع بالشكل ده وبالاسم ده وطبعاً فيه فرق كبير بين المدونات والمنتديات وأكيد واضحة جداً والتحاور والنقاش والاختلاف في وجهات النظر من خلال كل طابع وكل شخصية وكل أهتمام وانتماء ولكنه طبعاً لا يفسد للود قضية لإن هو ده التدوين لإنه بيعبر عن كل واحد فينا بكل كيانه وحياته
تحياتي ليكي وأشكرك على زيارتك ومستني زيارات قادمة
Post a Comment